Damascus-(Puntland Mirror) Afhayeenka ugu weynaa ee ururka ISIS, Abu Maxamed Al-cadnaani ayaa lagu dilay gobolka Aleppo ee dalka Suuriya, sida uu sheegay website-ka ku dhow kooxda ISIS.
Website-ka Amaq oo kamid ah warbaahinta lala xiriiriyo ISIS, ayaa sheegay shalay oo Talaado ahayd in Cadnaani la dilay isagoo kormeerayay howlgalo militari oo ka socda Aleppo.
Cadnaani ayaa lagu qeexi jiray hoggaamiyaha labaad ee ugu sareeya kooxda hubaysan ee ISIS, wuxuuna ahaa mid kamid ah masuuliyiinta ugu xilhaynta dheer ee kooxda.
Faahfaahinta ku saabsan dhimashada Cadnaani ayaan wali cadayn.
Cadnaani ayaa kamid ahaa afar sarkaal oo sare oo Maraykanka uu aad u raadinayay, waxaana madaxiisa dulsaarnaa lacag dhan $5 milyan oo lagu abaalmarinayo cidii soo sheegta warbixin ku saabsan oo lagu soo qabanayo.
Bilowgii sanadkan, ayuu ku baaqay in weeraro culus la qaado inta lagu guda jiro bisha Barakaysan ee Ramadaan. Sidoo kale wuxuu ku baaqay weeraro in lagu qaado wadamada Reer Galbeedka.
Kooxda ISIS ayaa maamusha dhul badan oo kuyaala wadamada Suuriya iyo Ciraaq, waxayna dagaal kula jirtaa ciidamada uu dabada ka riixayo Maraykanka iyo jabhadaha kale ee jooga labadaas dal.
Related Posts
March 29, 2018 Shirkada Air Djibouti oo duulimaadyo ka bilaabi doonta Boosaaso
May 23, 2019 Labo katirsan maleeshiyada ISIS oo lagu dilay duqeyn uu Mareykanku ka geystay Puntland
December 7, 2016 Xasan Shiikh oo Kismaayo kula kulmay xildhibaanada aqalka hoose iyo aqalka sare ee Jubbaland laga soo doortay
April 3, 2017 Burcadbadeeda Soomaaliya oo afduubtay markab shixnada qaada oo laga leeyahay Hindiya
Be the first to comment