Muqdisho-(Puntland Mirror) Dagaal culus oo u dhaxeeya ciidamada dowladda federaalka Soomaaliya oo ay weheliyaan maleeshiyaad deegaanka ah iyo maleeshiyada Al-Shabaab ayaa maanta oo Arbaco ah ka bilaabmay deegaanka Yasooman ee gobolka Hiiraan, sida ay sheegeen ilo-wareedyo katirsan haayadaha ammaanka.
Dagaalka ayaa bilaabmay kadib markii maleeshiyada Al-Shabaab ay weerar ku soo qaadeen ciidamada dowladda iyo maleeshiyada deegaanka, kaasoo ay ka dhalatay khasaare dhimasho iyo dhaawacba leh.
Wasaaradda warfaafinta Dowladda Federaalka Soomaaliya ayaa war-saxaafadeed ay soo saartay ku sheegtay in dagaalka maanta ka dhacay deegaanka Yasoomaan ay ku dileen 20 maleeshiyo oo Al-Shabaab ah.
“Ciidanka Xoogga dalka Soomaaliya ayaa 20 tirsan maleeshiyada Al-Shabaab ku dilay deegaanka Yasooman ee gobolka Hiiraan oo ay saakay soo weerareen.” Ayaa lagu sheegay war-saxaafadeed.
Saddex askari oo katirsan ciidamada dowladda ayaa dagaalka ku dhintay, sida ay dowladdu ku sheegtay war-saxaafadeedka.
Ciidamada dowladda iyo maleeshiyo deegaanka ah ayaa tan iyo bartamihii bishii September dagaal kula jiray maleeshiyada Al-Shabaab kaasoo ay ku doonayaan in maleeshiyada ay uga saaraan gobolka.
Related Posts
May 8, 2017 Madaxweynaha Nayjeeriya Muxamadu Buhari oo markale arrimo caafimaad u aadi doona dalka Ingiriiska
October 16, 2018 60 dagaalyahan oo katirsan Al-Shabaab oo lagu dilay duqeyn uu Mareykanku ka geystay deegaanka Xaradheere ee gobolka Mudug
November 25, 2017 sxb wu shaqayn
June 19, 2019 Wasaaradda arrimaha gudaha dowladda federaalka Soomaaliya oo ugu baaqday madaxda Galmudug in doorashooyinka lagu qabto wakhtigooda
