Ugu yaraan 30 qof oo ku geeriyootay weerar ay dablay katirsan ISIS ku qaadeen isbitaal milatari oo kuyaala gudaha caasimada Afghanistan ee Kabul

Maleeshiyada oo wadatay qoryo iyo bumbooyin ayaa albaabka hore ee isbitaalka qarax la eegtay kadibna waxay rasaas ku fureen shaqaalihii iyo bukaankii jiifay isbitaalka.

Ciidamada Kumaandooska Afghanistan ayaa markii dambe dilay dhammaan weeraryahanadii oo gaarayay afar kadib saacado badan oo ay socdeen dagaal u dhaxeeya weeraryahanada iyo ciidamada.

Ururka hubaysan ee ISIS ayaa sheegtay masuuliyada weerarkaas.

Ururka kale ee ka dagaalama dalka Afghanistan ee Talibaan ayaa iska fogeeyay in ay wax lug ah ku leeyihiin weerarkaas.

In ka badan 50 qof ayaa sidoo kale ku dhaawacantay weerarka sida ay sheegtay wasaaradda gaashaandhiga dalkaasi.

Madaxweynaha Afghanistan Ashraf Ghani ayaa sheegay kuwa weerarkaas geystay in ay burburiyeen dhammaan qiimaha bini’aadamka sababtoo ah waxa ay weerareen goob caafimaad.

ISIS oo ka dagaalanta Bariga Dhexe ayaa sanadkii 2015-kii iclaamisay in ay garab ciidan ka samaysatay gudaha dalka Afghanistan, tan iyo intaas wixii ka dambeeyay waxay gudaha dalkaasi ka geysatay weeraro badan oo dhiig ku daatay.

Waxay masuuliyadiisa sheegatay weerar lagu qaaday Maxkamada Sare ee gudaha Kabul bishii lasoo dhaafay, kaasoo lagu dilay ku dhawaad 22 qof.