Kismaayo-(Puntland Mirror) Ciidamo huwan ah oo isugu jira ciidanka maamulka Jubaland, ciidamada dowlada federaalka ee Jubooyinka iyo ciidamo Maraykan ah ayaa weerar ku qaaday saldhigyo maleeshiyada al-Shabaab ay ku leeyihiin duleedka magaalada Kismaayo, sida wararka sheegayaan.
Deegaanada ay ciidamada iskaashanaya weerarka ku qaadeen ayaa waxaa kamid ah, Buulo-gaduud, Baarka iyo Wirkoy, kuwaasoo qiyaastii 50km dhanka waqooyiga kaga beegan Kismaayo.
Ciidamada isbahaysanaya ayaa waxaa caawinaya diyaarado dagaal, kuwaasoo duqayn cirka ah ku haya saldhigyada maleeshiyada.
Dadka deegaanka ayaa sheegay in ciidamada huwanta ah ay iska-caabin kala kulmeen maleeshiyada al-Shabaab.
Saraakiisha dowlada federaalka Soomaaliya oo saxaafada la hadlay ayaa sheegay in howlgalkaas ujeedadiisu tahay sidii loo burburin lahaa saldhigyada kooxda al-Shabaab ee halkaas ku yaala.
Ma jirto warbixin si dhaqso ah loo helayo oo ku saabsan khasaaraha ka dhashay dagaalkaas.
Ilo-wareedyo lagu kalsoonaan karo ayaa sheegay in dagaalkaas uu sababay in ay go’do buundadii deegaanka Wirkoy oo ay dadka iyo gaadiidka uga gudbi jireen wabiga kadib markii maleeshiyada al-Shabaab ay qarax miino u galiyeen ciidamada huwanta ah oo doonayay in ay ka gudbaan buundada.
Related Posts
July 6, 2020 Madaxweynayaasha Dowladaha Xubnaha ka ah Dowladda Federaalka Soomaaliya oo shir ku yeelan doona Dhuusamabareeb
September 1, 2017 Ugu yaraan labo qof oo ku dhaawacmay weerar ay maleeshiyo aan haybtooda la aqoon ku qaadeen tuulada Bali Busle
December 2, 2016 Somali government forces kill at least two Al-Shabab militants in Bakool region
February 22, 2017 Hoggaamiyaasha wadamada deriska ah oo yimid Muqdisho si ay uga qaybgalaan caleemo-saarka Madaxweyne Farmaajo
