Soomaaliya oo sheegtay in Al-Shabaab milatari ahaan loo garaacay

New York-(Puntland Mirror) Wasiirka arrimaha dibada dowlada federaalka Soomaaliya Cabdisalaam Cumar Hadliye ayaa sheegay in guul laga gaaray howlgalada wadajirka ay u wadaan ciidamada milatariga Soomaalita iyo kuwa nabad illaalinta ee ka socda Midowga Afrika.

“Waxaanu milatari ahaan u garaacnay shaydaanka kaasoo ah Al-Shabaab,” ayuu yiri Abdisalaam Cumar Hadliye oo ka hadlayay xarunta Qaramada Midoobay ee magaalada New York.

Waxaa uu sheegay in kooxda Al-Shabaab ay maamusho wax ka yar 10 boqolkiiba oo dalka ah, wuxuuna xusay wasiirka in badan oo hoggaamiyaasha Al-Shabaab ah in la dilay ama dowlada ay isku soo dhiibeen intii lagu guda jiray bilihii u dambeeyay.

Cabdisalaam Cumar ayaa ka sheegay shirka sanadlaha ah ee wasiirada ee Qaramada Midoobay shalay oo Sabti ahayd in Al-Shabaab laga saraay deegaano badan oo ay kamidyihiin magaalooyin muhiim ah oo ay haysteen.

Waxaa uu sheegay in dowlada ay isku-dayayso sidii kor loogu qaadi lahaa howlgalada nabadgalyo si looga hortago weeraro cusub oo kayimaada maleeshiyada Al-Shabaab.

Hadliye ayaa sheegay in kooxda Al-Shabaab sida dhabta ah ay ka fogaatay dadka Soomaaliyeed, weeraradeeda waxshinimada ahna ay tusaale sax ah u yihiin in awoodeedii wiiqantay.

Kooxda Al-Shabaab ayaa u dagaalamysa sidii ay awooda uga tuuri lahayd dowlada ay Qaramada Midoobay taageerto ee Soomaaliya, kooxda ayaa rabta in dalka ka samayso maamul Islaami ah oo ay iyadu maamusho.