Munaasibada maalinta caalamiga ah Aids-ka oo lagu qabtay Garoowe, iyo sargaal la nool xanuunka oo la dalacsiiyay

Isaga oo ka hadlayay musaasibada, agaasimaha haayada la daagalanka Aids-ka ee Puntland Cabduqaadir Maxamed Axmed ayaa sheegay 486 qof oo qaba Aids ay haayadu diiwaangelisay.

“Xilligan la joogo dadka xanuunka la nool oo daawada qaata waa 486 qof dhammaan Puntland.” Ayuu yiri.

Gudaha Puntland, Janaayo ilaa bishii September waxaa la baaray 1024 qof kuwaasoo helay baaris lacag la’aan ah waxaana cudurka laga helay 56 qof, sida uu sheegay agaasimuhu.

Sanad walba 1-da December ayaa dunida laga xusaa maalinta Aids-ka si loogu midoobu la dagaalanka HIV, oo ah fayrus la ogaaday sanadkii 1984.

Sargaal la nool xanuunka oo la dalacsiiyay

Dhamme Bashiir Cismaan Cawad ayaa madaxweyne ku xigeenka Puntland Axmed Cilmi Cusmaan u dalacsiiyey derajada Gaashaanle, sida lagu sheegay digreeto ka soo baxday madaxtooyada maanta oo Axad ah.

Bashiir oo ah sargaal katirsan booliiska Garoowe, ayaa asbuucii lasoo dhaafay ka soo muuqday muuqaal si weyn loogu baahiyay baraha bulshada, kaasoo uu ku sheegay in uu la noolyahay fayruska HIV oo ay si kas ah ugu riday xaas hore oo uu guursaday.