Madasha Hoggaanka Qaran oo dib u dhigay fulinta doorashada 18-ka xubnood oo ay dhawaan ku kordhiyeen aqalka sare

Madasha Qaran ayaa isku raacday in fulinta doorashada 18-kaas xubnood dib loo dhigo ilaa iyo inta laga dhameystirayo doorashada madaxweynaha dowladda federaalka Soomaaliya.

Madashu ayaa sidoo kale isku raacday in wax-ka-beddel dastuureed lagu sameeyo qodobka 72-aad ee dastuurka dowladda federaalka Soomaaliya oo dhigaya in xubnaha aqalka sare ee DFS ay yihiin konton iyo afar (54), taasoo loo xilsaaray Raysulwasaare Cumar Cabdirashiid Cali Sharmarke.

“Madasha Hoggaanka Qaran MHQ ayadoo tixgelineysa ajendooyinka culus ee Baarlamaanka Federaalku horyaal loona baahan yahay in laga horqaado wax walba oo carqaladeyn kara xilgudashadiisa, Madaxda Hogganka Qaranka waxay isku raaceen…….In fulinta doorashada sideed iyo tobankii (18) kursi ee madashu ku kordhisay Aqalka Sare ee Baarlamaanka Federaalka dib loo dhigo ilaa iyo inta ay ka dhamaaneyso doorashada Madaxweynaha Jumhuuriyadda Federaalka Soomaaliya,” ayaa lagu yiri bayaanka kasoo baxay Madasha.

“In Ra’iisul Wasaaraha Xukuumadda Federaalka Soomaaliya codsi rasmi ah degdeg ugu diro Baarlamaanka Federaalka kana codsado in wax-ka-beddel dastuureed lagu sameeyo Qodobka 72-aad ee Dastuurka Federaalka oo xubnaha Aqalka Sare ee BFS oo hadda ah konton iyo afar (54) lagu kordhiyo sideed iyo toban (18) kursi oo tirada guud ee kuraasta Aqalka Sare la gaarsiiyo laba iyo toddobaatan (72) kursi, si loogu xalliyo cabashooyinka bulshada ka yimid lagana dhigo ajeendooyinka Baarlamaanka ee mudnaanta koowaad leh.” Ayaa lagu daray bayaanka Madasha kasoo baxay.

Go’aanka Madasha Hoggaanka Qaran  ayaa imaanaya dhowr maalin kadib markii Beesha Caalamka soo saareen bayaan ay kaga soo horjeedaan xubnaha cusub ee Madasha Qaran ay ku kordhisay aqalka sare 22-kii bishaan December.