Cabdiraxmaan Cabdishakuur oo musuqmaasuq ku eedeeyay haayadaha gargaarka ka howlgala Soomaaliya

Muqdisho-(Puntland Mirror) Ergayga madaxweynaha Soomaaliya u qaabilsan arrimaha abaarta Cabdiraxmaan Cabdishakuur Warsame ayaa haayadaha gargaarka ee ka howlgala Soomaaliya ku eedeeyay musuqmaasuq.

“Arrimihii gargaarka waxay noqdeen wax laga ganacsado, weliba dadka ka shaqeeya, maahan dadka deeqda bixiya, waayo haayadaha ayay u soo dhiibaan, marka waa haayadaha waxa la habsaamay shaqada,” ayuu ku yiri wareysi uu siiyay laanta Af-Soomaaliga ee VOA.

Cabdiraxmaan ayaa sheegay in 12 sanno ee u dambeysay ay ku baxday $8 bilyan oo gargaar ah gudaha Soomaaliya, haddana ay dhibbatadii taagantahay ayna sii kordhayso.

Waxa uu sheegay in Dowladda Soomaaliya aysan la xisaabtamin haayadaha ka shaqeeya gargaarka, aanan miiska loo saarin mudnaanta ay Soomaaliya u baahantahay.