Safarka Erdogan ee Soomaaliya iyo Itoobiya: rajada xalka khilaafka Geeska Afrika

Istanbul-(Puntland Mirror) Madaxweynaha Turkiga Recep Tayyip Erdogan ayaa booqan doona Soomaaliya iyo Itoobiya horraanta sanadka soo socda kadib markii uu dhex dhexaadiyay heshiis lagu soo afjarayo xiisadda labada dal ee Geeska Afrika, sida uu ku sheegay barta X Axaddii.

“Waxaan booqan doonaa Itoobiya iyo Soomaaliya labada bilood ee ugu horreeya sanadka cusub,” ayuu ku yiri farriin uu ku xusay heshiiska dhex maray Madaxweynaha Soomaaliya Xasan Shiikh Maxamuud  iyo Ra’iisul Wasaaraha Itoobiya Abiy Ahmed oo ka dhacay Ankara Diseembar 11.

Labada dhinac ayaa ku heshiiyay inay soo afjaraan khilaafkoodii aadka u adkaa ee socday ku dhawaad hal sano, kaddib saacado wada-hadal ah oo uu garwadeen ka ahaa Erdogan, kaasoo guusha lagu gaaray ku tilmaamay “taariikhi.”

Khilaafkan ayaa billowday bishii Janaayo markii Itoobiya oo aan bad lahayn ay heshiis la gashay maamulka Somaliland oo kuyaala waqooyiga Soomaaliya si ay u kireysato dhul xeebeed looga dhiso deked iyo saldhig milatari.

Iyadoo taas beddelkeeda, Somaliland oo ku andacoota in ay ka go’day Soomaaliya inteeda kale tan iyo1991-kii, balse ku guuldaraysatay aqoonsi calami ah—ayaa sheegtay in Itoobiya ay si rasmi ah u aqoonsan doonto, inkastoo Addis Ababa aysan weligeed xaqiijin arrintaas.

Soomaaliya ayaa heshiiskaas ku tilmaantay mid ku xad-gudbaya qarannimadeeda, taasoo keentay in caalamka laga dareemo walaac ku saabsan khatar dagaal cusub oo ka qarxa gobolka xasillooni darrada ka jirto ee Geeska Afrika.

Turkiga ayaa gacan ka geystay dhex-dhexaadinta bishii Luulyo, isagoo qabtay saddex wareeg oo wada-hadal ah — laba ka dhacay Ankara iyo mid ka dhacay New York — ka hor inta aan la gaarin guushii toddobaadkii hore, taasoo amaan ka heshay Midowga Afrika, Washington iyo Brussels.