Erdogan oo ku eedeeyay Mareykanka in uu taageero kooxo argagixiso

Last updated: December 28, 2016 11:17 am

1 Min Read

President Erdogan — **Madaxweynaha Turkiga Recep Tayyip Erdogan. [Sawirka: Archive]**

Ankara-(Puntland Mirror) Turkiga iyo Ruushka ayaa si isku mid ugu eedeeyay Mareykanka in uu taageerayo waxay ugu yeereen “kooxo argagixiso” oo jooga gudaha dalka Suuriya.

Madaxweynaha Turkiga Recep Tayyip Erdogan ayaa sheegay shalay oo Talaado ahayd in uu hayo cadaymo muujinaya in xoogaga xulufada uu Mareykanku hoggaaminayo ay taageero siiyaan kooxda Dowladda Islaamiga ah ee Ciraaq sidoo kale loo yaqaan (Daacish) iyo kooxaha Kurdiyiinta, ee lagu magacaabo (YPG) iyo (PYD).

“Waxay nagu eedeeyaan anaga in aan taageerno Daacish,” ayuu yiri Madaxweyne Erdogan.

“Hadda waxay taageero siiyaan kooxo argagixiso oo ay kamidyihiin Daacish, YPG iyo PYD. Taasi waa cadahay. Waxaanu haynaa cadaymo muujinaya, sawiro iyo muuqaalo,” ayuu ku daray Erdogan.

Si lamid ah, afhayeenka wasaaradda difaaca Ruushka ayaa Talaadadii sheegtay in go’aanka uu Mareykanku ku debcinayo hubaynta kooxaha falaagada ee Suuriya ay khatar ku tahay ciidamada Ruushka ee ku sugan gudaha dalka Suuriya.