Tirada dhimashada oo gaartay 30 qof kadib qarax gaari oo ka dhacay banaanka hore ee dekada weyn ee Muqdisho

Qaraxa ayaa dhacay kadib markii gaari walxaha qarxa laga soo buuxshay lagu qarxiyay albaab kuyaala duleedka dekada weyn ee Muqdisho saakay oo Axad ah.

Dad goobjoogayaal ah ayaa sidoo kale maqlay rasaasta qoryaha kadib qaraxa.

Kooxda hubaysan ee Al-Shabaab ayaa sheegatay masuuliyada weerarkaas, sida ay ku sheegtay bayaan laga sii daayay idaacadooda, Radio Andalus.

Sabtidii shalay, ugu yaraan labo askari oo ciidamada dowladda federaalka Soomaaliya ah ayaa ku dhimatay kuwo kalena waa ay ku dhaawacmeen qarax gaari oo ka dhacay kantarool kuyaala duleedka Muqdisho.

Maleeshiyada  Al-Shabaab ayaa boqolaal qof dishay sanadadii u dambeeyay, walina waxay wadaa weerarada dhiiga badan ku daatay ee ka dhanka ah saraakiisha dowladda Soomaaliya iyo dadka rayidka ah.