Soomaaliya oo taageertay howlgalka millatari ee uu Turkigu ka waddo gobolka Afrin ee dalka Suuriya

Wasiirka Arrimaha Dibada Soomaaliya Axmed Ciise Cawad. [Sawirka]

Muqdisho-(Puntland Mirror) Soomaaliya ayaa taageertay howlgalka millatari ee uu Turkigu ka waddo gobolka Afrin ee kuyaala waqooyiga-galbeed ee dalka Suuriya, sida ay wakaalada wararka Turkiga ee Anadolu kasoo xigatay Wasiirka Arrimaha Dibada Soomaaliya.

Axmed Ciise Cawad ayaa Anadolu u sheegay in dalkiisu uu taageersanyahay howlgalkaas.

“Waxaanu taageersanahay howlgalka millatari ee uu Turkigu ka bilaabay Afrin,” ayuu yiri Wasiirka Arrimaha Dibada Soomaaliya Axmed Ciise Cawad.

“Turkigu xaq bay u leeyihiin in ay is difaacaan, waxaan la hadlay Wasiirka Arrimaha Dibada Turkiga Mevlut Cavusoglu waxaana u sheegay in Soomaaliya ay taageersantahay,” ayuu ku sii daray.

Turkiga ayaa asbuucii lasoo dhaafay howlgal millatari ka bilaabay gobolka Afrin si ay halkaas uga saaraan maleeshiyooyinka PYD/PKK iyo Daacish.

Turkiga ayaa Soomaaliya taageerayay tan iyo sanadkii 2011, waxaana uu dalka kuyaala Geeska Afrika ka dhistay saldhigiisa milatari ee ugu weyn adduunka, iyo safaarada ugu balaaran caalamka.