Soomaaliya oo Eriday Masuul Diplomaasiyadeed oo Itoobiyaan ah

Muqdisho-(Puntland Mirror) Soomaaliya ayaa shaqaale diplomaasiyadeed ee Itoobiya oo ka shaqeeya Muqdisho ku dhawaaqday inuu yahay mid aan la aqbali karin.

War-saxaafadeed ay soo saartay fiidnimadii Talaadada, Wasaaradda Arrimaha Dibadda ee Soomaaliya ayaa ku eedaysay diplomaasiga inuu ku hawlan yahay “dhaqanno aan waafaqsanayn doorkiisa diplomaasiyadeed.”

Diplomaasiga, Cali Maxamed Aadan, oo ah la-taliye ka tirsan safaaradda Itoobiya ee Muqdisho, ayaa amar lagu siiyay inuu dalka ka baxo 72 saacadood gudahood marka uu helo ogaysiiskan. Soomaaliya ma aysan faahfaahin waxa loo haysto Cali, balse war-saxaafadeedka ayaa sheegay in ficiladaasi ay “meel ka dhac ku yihiin Heshiiska Vienna ee Xiriirka Dibloomaasiyadeed.”

Soomaaliya iyo Itoobiya ayaa waxaa ka dhex taagnaa xiisad diplomaasiyadeed tan iyo markii Addis Ababa ay heshiis is-afgarad (MOU) oo sharci daro ah la saxiixatay maamulka Somaliland bishii Janaayo 2024, taasoo ah tilaabo xad-gudub ku ah madaxbannaanida Soomaaliya.

Bishii Abriil 2024, Soomaaliya waxay eriday Safiirka Itoobiya Muktaar Maxamed Waare, iyadoo ku eedeysay “faragelin gudaha ah” oo Itoobiya ka wadday Soomaaliya. Waxay sidoo kale amartay in la xiro qunsuliyadaha Itoobiya ee Somaliland iyo Puntland, in kastoo ay weli furan yihiin.

Bishii hore, Raysul Wasaare Xamza Cabdi Barre oo ka hadlayey Golaha Guud ee Qaramada Midoobay ayaa ugu baaqay beesha caalamka inay taageeraan Soomaaliya, cambaareeyaana xad-gudubyada Itoobiya.