Muxuu Madaxweynaha cusub ee Soomaaliya diiradda saari doonaa 100 maalmood ee u horeeyay?

Madaxweynaha cusub ee Soomaaliya Xasan Shiikh Maxamuud. [Isha Sawirka: Facebook]

Muqdisho-(Puntland Mirror) Madaxweynaha cusub ee Dowladda Federaalka Soomaaliya Xasan Shiikh Maxamuud ayaa la filayaa in asbuuca soo socda uu la wareegi doono xafiiska, sida ilo-wareedyo dowladda katirsan ay u sheegeen bog wareedka Puntland Mirror.

Madaxweynaha oo wareysi siiyay VOA Somali ayaa sheegay in ammaanka, xasiloonida siyaasadda iyo dib u habaynta dhaqaalaha uu maamulkiisa cusubi diiradda saari doono boqolka maalmood ee u horeeya.

“Waxaan rabnaa in boqolka maalmood ee ugu horeysa aan dalka ka dhaqangelino waxa aan damacsanahay ee amniga, xasiloonida siyaasadda iyo dib u kabida dhaqaalaha in sharcigii ay ku shaqayn lahaayeen aan salka u dhigno,” ayuu yiri Madaxweyne Xasan Shiikh Maxamuud.

Xasan Shiikh oo 66-sanno jir ah, oo Soomaaliya soo hoggaamiyay 2012 ilaa 2017, ayaa Axadii dib markale loo doortay kadib markii uu ka adkaaday madaxweynaha xilka ka tagaya Maxamed Cabdullaahi Farmaajo.