Madaxweyne Farmaajo oo waraaqaha aqoonsiga ka guddoomay danjiraha cusub Ingiriiska ee Soomaaliya

Danjiraha cusub Ben Fender ayaa aqbalaada kadib kulan la yeeshay madaxweyne Farmaajo, waxaana ay ka wadahadleen labada dal iyo sidii sare loogu qaadi lahaa wadashaqaynta iyo iskaashiga taariikhiga ah ee u dhexeeya labada dowladood, sida lagu sheegay war-saxaafadeed kasoo baxay Villa Soomaaliya.

Sidoo kale, madaxweynaha iyo danjire Ben Fender ayaa ka wada hadlay in dowladda Ingiriisku ay xoojiso taageerada ay u fidiso dowladda Soomaaliya ee dhanka tababarka ciidamada booliiska iyo dagaalka ka dhanka ah kooxaha argagixisada.

Dabayaaqadii bishii Janaayo ee sanadkan, ayaa Ingiriisku Ben Fender u soo magacaabeen danjiraha Soomaaliya, isaga oo badalay David Concar.