Madaxweyne Farmaajo iyo dhiggiisa Kenya oo isku afgartay in la hakiyo dhismaha derbiga xadka labada dal

Madaxweyne Farmaajo iyo Uhuru Kenyata oo wada sheegaysanaya xilligii caleemosaarka Farmaajo. [Sawirka]

Muqdisho-(Puntland Mirror) Madaxweynaha Soomaaliya Maxamed Cabdullaahi Farmaajo iyo dhigiisa Kenya Uhuru Kenyata ayaa wadahadal ay ku yeesheen khadka taleefoonka isku raacay in la hakiyo dhismaha derbiga ka socda xadka Kenya iyo Soomaaliya, sida ay ku warantay wakaalada wararka Soomaaliya ee Sonna maanta oo Isniin ah, oo soo xiganeysa guddoomiyaha gobolka Gedo.

Maxamed Maxamuud Maxamed, guddoomiyaha gobolka Gedo ayaa Sonna u sheegay in masuuliyiin sare oo ka socda labada dal ay 27-ka Maarso kulmi doonaan si ay xal uga gaaraan arrinta.

Maalmihii lasoo dhaafay xiisad ayaa ka taagneyd magaalada Beled Xaawo kadib markii Kenya ay halkaas dib uga bilowday derbi u dhaxeyn doona xuduuda labada dal. Dadka deegaanka Beled Xaawo ayaa aad uga carooday derbi dhisida Kenya iyaga oo ku eedeynaya in ay soo gashay qeyb kamid ah dhulka Soomaaliya.