ICJ oo sheegtay in garsoorkeeda ku aadan muranka badda ee u dhaxeeya Soomaaliya iyo Kenya ay sii deyn doonto 12-ka October

Hague-(Puntland Mirror) Maxkamada Cadaalada Adduunka (ICJ) ayaa bayaan ay maanta soo saartay ku sheegtay in garsoorkeeda ku aadan muranka badda ee u dhaxeeya Soomaaliya iyo Kenya ay sii deyn doonto 12-ka October 2021.

Sanadkii 2014, dowladda Soomaaliya ayaa u gudbisay maxkamada ICJ in ay qaado dacwada muranka labada dal.

Labada dal ee dariska ah waxay sheeganayaan lahaanshaha 150,000 kiilomitir oo labo jibaar ah oo kuyaala xeebta Badweynta Hindiya, halkaas oo la sheegay in ay qani ku tahay saliid, gaas iyo kaluunka tuna.

Kenya ayaa dhowr jeer oo hore isku dayday in kiiska lagu xaliyo wadahadal, balse Soomaaliya ayaa ku gacan sayrtay, iyada oo sheegtay in ay keliya aqbali doonto garsoorka maxkamada ICJ.