Gaadiid sida gargaar oo ku sii qulqulaya Qardho

Gaariyaal sida gargaar oo ka baxaya Garoowe, April 29, 2020. [Isha Sawirka: Facebook]

Garoowe-(Puntland Mirror) Gaadiid sida gargaar ay ku jiraan cuno iyo waxyaabaha kale ee muhiimka u ah nolosha oo ka baxay magaalooyinka waa-weyn ee Puntland ayaa ku sii jeeda magaalada ay fatahaaduhu ku dhufteen ee Qardho.

Gargaarka ayaa ah mid ay iska uruuriyeen dadka reer Puntland ee kunool magaalooyinka waa-weyn sida Boosaaso iyo Garoowe. Gargaar kale ayaa laga filayaa magaalooyinka kale.

Ugu yaraan lix qof ayaa ku geeriyooday daadad ku dhuftay magaalada Qardho habeenimadii Isniinta, sida uu sheegay duqa Qardho Cabdi Siciid Cusmaan.

Sidoo kale biyaha ayaa burburshay guryo deegaan ah iyo xarumo ganacsi oo kuyaala magaalada.

Madaxweynaha Puntland Siciid Cabdullaahi Deni oo shalay gaaray Qardho ayaa magacaabay guddi ka kooban wasiiro iyo ganacsato kuwaasoo hormuud u noqon doona dadaalada gargaarka Qardho.