Garoowe-(Puntland Mirror) Burcad-badeed Soomaaliyeed ayaa sii daayay markabka xamuulka qaada ee Lutuf, oo ku safrayay calanka dalka Cameroon, kaas oo la afduubtay 17-kii Agoosto, sida ay sheegeen ilo-wareedyo maxalli ah.
Ilaa hadda ma cadda in burcad-badeeddu ay heleen lacag madax-furasho ah si loo sii daayo markabka. Hase yeeshee, ilo-wareedyo ayaa sheegay in sii-daynta markabka ay ku timid wada-xaajood dhex maray dhinacyada ku lugta lahaa.
Lama hayo faahfaahin dheeraad ah oo ku saabsan heshiiska lagu sii daayay markabka iyo xaaladda shaqaalihii saarnaa, iyadoo aan weli wax war rasmi ah laga soo saarin dhacdadan.
Afduubka iyo sii-daynta markabka LUTUF ayaa ku soo beegmaya xilli walaac laga muujinayo dib u soo laba-kaclaynta falalka burcad-badeedda ee xeebaha Soomaaliya, kaddib sannado ay hoos u dhaceen weerarrada noocan oo kale ah.
Warsaxaafadeed ka soo baxay Wasaaradda Warfaafinta Dowladda Federaalka Soomaliya ayaa lagu sheegay Dowladda Federaalka in Sabtidii hawlgal socday 10 maalmood lagu guulaystay in dib loo sii daayo markabka MV Lutuf iyo dhammaan shaqaalihii saarnaa. Warsaxaafadeed ayaa lagu sheegtay in ciidamada ammaanku ay markabka dib ula wareegeen, isla markaana uu hadda xaalad wanaagsan ku jiro.
