Jarmalka oo soo gabagabeeyay howlgalka milatari ee gudaha Soomaaliya

Ciidamada Jarmalka ayaa si dhammeystiran u soo gabagabeeyay ka bixitaanka ciidamadooda iyo qalabkooda gudaha Soomaaliya, sida ay daabacday wakaalada wararka Anadolu, oo soo xiganeysa website-ka ciidamada Jarmalka.

“Mustaqbalka, joogista Jarmalka ee gudaha Soomaaliya waxay diirada saari doontaa horumarinta dhismayaasha bulshada si loo xaqiijiyo ammaanka bulshada,” ayaa lagu yiri bayaan lagu daabacay website-ka.

Wargeyska asbuuclaha ah ee Jarmalka kasoo baxa ee Der Spiegel ayaa sheegay in khatarta amniga ee wadanka ka jirta ay kaalin ka qaadatay go’aanka Berlin ee ah inaysan sii kordhin doonin askarta tababarka ciidamada Midowga Yurub ee Soomaaliya.

Tan iyo sanadkii 2010, Jarmalka ayaa ku dhawaad tobonaan ciidamo ah ku lahaa tababarka ciidamada Midowga Yurub ee ku sugan Muqdisho, kuwaasoo tababaray in ka badan 5,600 askar Soomaali ah.