Maleeshiyada Al-Shabaab oo ciidamada Galmudug kala wareegay magaalada Camaara ee gobolka Mudug

Ilo-wareedyo dadka deegaanka ah oo codsaday in aan magacooda la sheegin ayaa warsidaha Puntland Mirror u sheegay in maleeshiyadu ay weerar culus ku soo qaadeen saldhigyada ciidamada millatariga ee Galmudug, kahor inta aysan si buuxda u la wareegin magaalada Camaara, oo kutaala koonfurta gobolka Mudug.

Ilo-wareedka ayaa intaas ku daray in dagaalka uu ka dhashay khasaare badan oo dhimasho iyo dhaawac leh oo soo gaaray labada dhinacba.

Camaara iyo tuulooyinka ku dhow ayaa ahaa goobo dagaal oo dagaal culus ku dhexmaray ciidamada maamulka Galmudug iyo maleeshiyada Al-Shabaab intii lagu guda jiray asbuucyadii lasoo dhaafay.

Dhanka kale, ciidamo huwan ah ayaa ku wajahan magaalo xeebeedka Xara-dheere ee gobolka Mudug, halkaas oo ay Al-Shabaab ku xoogantahay, ciidamada ayaa doonaya in ay halkaas kala wareegaan maleeshiyada.