Haayada caalamiga ah ee haajiraada IOM oo dalbatay $24.6 milyan si ay u quudiso boqolaal kamid ah dadka ay abaartu saamaysay ee gudaha Soomaaliya

Warbixinada haayadaha gargaarka ayaa walaac ka muujinaya in Soomaaliya ay ku dhici karto abaartii ku dhufatay sanadkii 2011-kii, taasoo dishay kumanaan dad ah.

IOM ayaa ka digtay abaartan daran ee jirta in ay tiro badan oo dad ah khatar dhigi karto. Afhayeenada IOM Olivia Headon ayaa sheegtay in loo baahanyahay in la kordhiyo gargaarka insaanimo si looga hortago in macaluul ay ka dhacdo meelaha qaar.

“Mushahaaraadkii waa burburay, qiimaha cunada maxaliga ah waa siyaaday, dhimashada xooluhu waa kordhay, heerka nafaqo daro waxa uu bilaabay in uu kor u kaco, qiimaha biyaha siyaaday dadka Soomaalida ee guuraya ayaa kordhay si ay u raadsadaan cuno iyo biyo. Caawimaad la’aan, dad badan ayaa wajahaya nafaqo daro, waxayna khatar ugu jiraan dhimasho.” Ayay tiri Olivia Headon.

Dalabka IOM ayaa bartilmaameedsanaya in ka badan hal milyan oo kamid ah 6.2 milyan oo dad ah oo ay saamaysay abaarta Soomaaliya oo u baahan caawimaad ilaa iyo bisha June, sida ay sheegtay afhayeenka IOM.

Headon, ayaa intaas ku dartay in ay muhiimada siin doonaan baahiyaha cunada, biyaha, nadaafada, caafimaadka iyo nafaqada, iyo hoyga.