Wefdi ka socda Midowga Afrika oo qiimaynaya doorashada Soomaaliya oo yimid Muqdisho

Muqdisho-(Puntland Mirror) Wefdi ka socda xarunta Midowga Afrika ee Addis Ababa ayaa gaaray magaalada Muqdisho maanta, wefdiga ayaa halkaas u tagay qiimayn, iyadoo ay soo aadanyihiin doorashooyin, la qorsheeyay in ay dhacaan bisha August iyo September ee sanadkan.

“Waxaan halkan u nimaanay si aan u dhagaysano dhamaan  qaybaha kala duwan sida, saaxiibada AMISOM iyo UNSOM, waxaanu  rabnaa  in aan fiirino waxa la rabo, kadibna aanu dib u noqono aana fiirino sida ugu fiican oo guddiga uu u taageeri doono shaqada AMISOM, gaar ahaan hanaanka doorashada soo socota,” sidaa waxaa yiri Mr Olabisi Dare, oo ah hoggaamiyaha wefdiga.

Wefdiga ayaa sidoo kale la kulmay Raysulwasaare ku-xigeenka Soomaaliya Maxamed Cumar Carte “Qaalib” iyo saraakiil sare oo dowlada federaalka ah, kuwaasoo uga mahadceshay Midowga Afrika taageeradooda joogtada ah ee ay siiyaan Soomaaliya.