Dowladda Hoose ee Garoowe oo bilowday howlgal lagu burburinayo dhismayaal sharci daro ah oo laga dhisay waddooyinka

Howlgalka oo bilowday dhawaan ayaa lagu burburiyay dhismayaal badan oo ka dhisnaa waddooyinka magaalada.

Duqa magaalada Garoowe Xasan Maxamed Ciise Goodir oo warbaahinta la hadlay ayaa sheegay in ujeedka howlgalka uu yahay sidii loo hagaajin lahaa bilicda iyo horumarka magaalada Garoowe oo ah caasimada Puntland.

Qayb kamid ah waddooyinka laga burburshay dhismayaasha sharci darada ah ayaa la filayaa in laami la saari doono mustaqbalka sida uu guddoomiyuhu sheegay.

Garoowe ayaa ah magaalo caan ku ah waddooyin waa-weyn kuwaasoo kaalin muuqata ka qaatay horumarka gananacsiga iyo ammaanka magaalada.