Xasan Shiikh Maxamuud oo tagay magaalada Kismaayo

Madaxweynaha iyo wefdiga la socday ayaa waxaa si diiran ugu soo dhaweeyay garoonka diyaaradaha madaxweynaha maamulka Jubbaland Axmed Maxamed islaam iyo saraakiil kale oo katirsan Jubbaland.

Lama oga ujeedada rasmiga ah ee safarka madaxweynaha Kismaayo, balse waxaa loo malaynayaa in ay xiriir la leedahay arrimo olole.

Magaalada Kismaayo ee xarunta maamulka Jubbaland ayaa noqotay meel ay diirada saaraan murashixiinta madaxweyna Soomaaliya, dhammaan murashixiinta madaxweynaha ayaa booqanaya halkaas si ay uga ololeystaan.

Asbuucii lasoo dhaafay, waxaa halkaas tagay Raysulwasaare Cumar Cabdirashiid Cali Sharmaake si uu kulamo ula yeesho xubnaha aqalka hoose iyo aqalka sare ee Jubbaland kasoo jeeda.

Xasan Shiikh Maxamuud ayaa doonaya in mar labaad loo doorto madaxweynaha Soomaaliya.