Mareykanka oo sheegay in ay baaritaan ku sameyn doonaan khasaare dad shacab ah kasoo gaaray weerar ka dhacay deegaanka Bariire

“Waxaanu maskaxda ku haynaa eedaha khasaaraha dadka shacabka ah ee Bariire. Waxaanu qaadanaynaa wax walba oo eedo ah oo khasaaraha shacabka ah, waxaanu bilownay baaritaan ku saabsan xaalada si loo ogaado xaqiiqooyinka halkaas ka jira,” ayay bayaan ku sheegeen Mareykanku.

“Waxaanu xaqiijinaynaa in ciidamada Soomaaliya ay qaadeen howlgalka ka dhacay deegaankaas iyaga oo ciidamada Mareykanku ay kaalin taageero ah ku lahaayeen.”

Ugu yaraan 10 qof oo ay ku jiraan saddex caruur ah ayaa ku geeriyooday howlgal ay ciidamada Soomaaliya iyo kuwa Mareykanka ka geysteen tuulada Bariire ee gobolka Shabeellaha Hoose shalay oo Jimce ahayd.

Mareykanka ayaa bayaankooda ku sheegay in ciidamada Mareykanku ay Soomaaliya ku joogaan codsiga Dowladda Federaalka Soomaaliya ayna naftooda u hureen sidii ay u caawin lahaayeen ciidamada Soomaaliya ee dagaalka kula jira Al-Shabaab si loo xasiliyo gobolka.