Burbur soo gaaray wadada laamiga ah ee isku xirta gobolada Puntland kadib daadkii ay roobabku keeneen

Wadada ayaa yeelatay godad iyo burbur kadib markii ay mareen daadad ay keeneen roobabkii mahiigaanka ahaa ee maalmihii u dambeeyay ka da’ayay deegaanada Puntland.

Meelaha ugu daran ee dhibaatadu ay wadada ka soo gaartay ayaa ah meel u dhow deegaanka Sinujiif ee gobolka Nugaal halkaas oo daadadku ay xaaqeen buundo yar, taasoo keentay in uu go’o gabi ahaanba isku socodka dadka iyo ganacsiga ka dhaxeeya gobolada Puntland.

Khuburada ayaa ka cabsi qabta in dhibbaatada soo gaartay wadada ay keeni garto shilal gaari haddii aan la sameyn dayactir.