Muqdisho-(Puntland Mirror) Bangiga Adduunka ayaa ansixiyay deeq dhan $112 milyan oo doolar oo lagu taageerayo shaqo abuurka, ilaalinta bulshada, iyo u adkeysiga cimillada ee Soomaaliya, iyadoo ay ka faa’iideysan doonaan in ka badan 738,000 oo qof oo dalka oo dhan ku nool.
Dhaqaalahan waxa uu qeyb ka yahay wejiga labaad ee Mashruuca Shabakadda Badbaadada Jawaabta Degdegga ah ee Soomaaliya ee Awooda Bani’aadamka (SNHCP II), kaas oo ujeedkiisu yahay in la balaariyo barnaamijyada lacagta lagu bedelayo shaqada, la xoojiyo shabakadaha badbaadada bulshada, isla markaana lagu maalgeliyo kaabayaasha dhaqaalaha ee u adkeysan kara isbeddelka cimilada.
Mashruucan wuxuu diiradda saari doonaa kooxaha nugul, oo ay ka mid yihiin bulshooyinka miyiga, dadka dalka gudihiisa ku barakacay, iyo kuwa ay saameynta ka soo gaartay dhibbaatooyinka ay sababtay cimilada sida abaaraha iyo fatahaadaha.
“Mashruucani wuxuu Soomaaliya ka caawin doonaa dhismaha mustaqbal loo dhanyahay oo u adkeysan kara cimilada,” ayay tiri Kristina Svensson, Madaxa Bangiga Adduunka ee Soomaaliya.
Wasaaradda Shaqada iyo Adeegyada Bulshada ayaa fuli doonta barnaamijkan iyadoo kaashanaysa UNICEF iyo Barnaamijka Cuntada Adduunka (WFP).
SNHCP II wuxuu ku dhisan yahay dadaalladii hore ee lagu aas-aasay nidaamka ilaalinta bulshada ee Soomaaliya, wuxuuna la jaanqaadayaa mudnaanta horumarineed ee dalka sida ku cad Qaab-dhismeedka Iskaashiga Dalka Soomaaliya (Somalia Country Partnership Framework).
