Abaarta ka jirta Puntland oo sababtay in xooluhu ay dhintaan

Xoolo dhaqatada ayaa sheegaya in caws iyo biyo la’aanta ay sababtay in xooluhu ay dhintaan.

“Xooluhu waa ay dhimanayaan sidoo kale dadkuna khatar buu ku jiraa maxaa yeelay waxay noo ahaayeen maal aan quudano,” Cusmaan Siciid oo ah xoolo dhaqato ku sugan dooxada Ayax ee gobolka Nugaal ayaa sidaa u sheegay warsidaha Puntland Mirror.

“Xoolo ma iibsan karno, suuq ma ay leh, mana aanu dheefsan karno waayo aad bay u macaluuleen, xaalad adag baanu ku jirnaa,” ayuu ku daray Cusmaan.

Puntland iyo dhammaan dalka oo dhan, haddii xoolaha nool la waayo waxay ka dhigantahay in la waayay dakhli.

Bilowgii bishaan, gudaha gobolka Karkaar, ugu yaraan labo qof ayaa ugu dhimatay haraad iyo gaajo, sida ay sheegeen dadka ka shaqeeya howlaha iinsaanimada.

Gobolada Nugaal, Bari, Mudug, Sool iyo Karkaar ayaa ugu daran meelaha ay abaarta jirta saamaysay.

Xilli roobaadkii Deyrta oo baaqatay, taasoo sida caadiga ah la heli jiray Oktoobar ilaa November, ayaa keentay abaarta taasoo la filayo in ay kasii darto bilaha soo socda.